الاثنين، 29 أغسطس، 2011

ليه خايف على رزقك ؟؟؟

| 0 التعليقات
 

ليه خايف على رزقك ؟؟؟



طب بداية ما هو الرزق؟؟

هل الرزق هو المال وبس؟!

**قال ابن منظور في لسان العرب:

الرزق: هو ما تقوم به حياة كل كائن حي مادي كان أو معنوي

فالرزق مادى ومعنوى خاص بالدنيا أو الآخرة

*فالمال والصحة والزواج والأولاد رزق

*والسعادة والرضا والعلم رزق

*والايمان بالله ورسوله واليقين بالله رزق

*قيام الليل وحفظ القران والإقبال على الطاعة رزق

يعنى الرزق هو كل حاجةتحتاجها بحياتك

ليه دايما أغلب المشاكل الي بنشوفها بتبقى متركزة في نقطة الخوف على الرزق ؟؟

أحنا متأكدين إن ربنا هو الرزاق؟! يعنى ايمان يقينى ؟

طيب نقول دلائل من الكتاب والسنة والواقع المشاهد لعل اليقين يزيد فى القلوب


قال تعالى وَفِي السَّمَاءِ رِزْقُكُمْ وَمَا تُوعَدُونَ اسمع تدبر القرآن فَوَرَبِّ السَّمَاءِ وَالْأَرْضِ إِنَّهُ لَحَقٌّ مِثْلَ مَا أَنَّكُمْ تَنْطِقُونَ ;[الذاريات:22-23].

الاية دى عجيبة جدا وجميلة جدا

***يقول الله: ; وَفِي السَّمَاءِ رِزْقُكُمْ

بالرغم من ان أموالنا وأرزاقنا وأعمالنا في الأرض، في الأرض الأسباب، أسباب الرزق،

والأسباب وحدها لا تضر ولا تنفع ولا ترزق ولا تمنع إلا بأمر مسبب الأسباب - جلّ وعلا - لذا أراد الله - عز وجل - أن يلفت العقول الذكية والقلوب التقية والفطر السوية

إلى أن الرزق في السماء،
 
 بيد خالق السماء والأرض الذي تكفل بأرزاق الخلق وأرزاق العباد،


تأملوا الصيغ التوكيدية المتعددة

فورب السماء والأرض قسم

إنه توكيد

( لحق) لام التوكيد أيضاً

مثل ما أنكم تنطقون تشبيه لزيادة التوكيد
سمع أعرابي هذه الآية فقال كلمات رقيقة جميلة جداً ماذا قال ؟
 
 من الذي أغضب الكريم حتى يقسم ؟

من هذا الذي لم يصدق الله على أنه هو الرزاق حتى أقسم الحق - تبارك وتعالى - بهذا القسم تلو القسم

هو احنا محتاجين ربنا يقسم لنا انه الرازق؟
 
 مش ايماننا بانه سبحانه الرازق من توحيد الربوبيه !

لكن بصراحة أفعالنا تدل إننا نحتاج للقسم زي ما هوواضح بعد كده




قال تعالى وَمَا مِنْ دَابَّةٍ فِي الْأَرْضِ إِلَّا عَلَى اللَّهِ رِزْقُهَا وَيَعْلَمُ مُسْتَقَرَّهَا وَمُسْتَوْدَعَهَا كُلٌّ فِي كِتَابٍ مُبِينٍ
سبحان الله كل مخلوق خلقه الله تكفل برزقه حشره _طائر _حيوان اى مخلوق مهما صغر تكفل برزقه



وقال أيضا وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ مَا أُرِيدُ مِنْهُمْ مِنْ رِزْقٍ وَمَا أُرِيدُ أَنْ يُطْعِمُونِ ; إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ [ الذاريات:56-58].

ربنا خلقنا عشان نعبده وتكفل بالرزق ..
فمعنى اننا نضيع العبادة عشان البحث عن الرزق ايه ؟
 
 
غير اننا لسنا مؤمنين حقا انه الرازق!!



قال الله تعالى ; إِنَّا كُلَّ شَيْءٍ خَلَقْنَاهُ بِقَدَرٍ [القمر:49]
 
فرزقك مقدر قبل أن تخلق،
 
بل قبل أن يخلق السماوات والأرض،
 
بل وكتب الله رزقك وأنت في بطن أمك كما

في الصحيحين من حديث أنس أن النبي - صلى الله عليه وسلم - قال: ( إن الله تعالى وكل بالرحم ملكاً )
 
يعني أرحام النساء على وجه الأرض المسلمات والكافرات،
 
 وكل الله بهذه الأرحام ملكاً من الملائكة بمعنى ألا تحمل أنثى على ظهر الأرض إلا بأمر المَلِك للمَلًك، يقول المَلَك ملَك الأرحام للمَلِك - جلّ جلاله -
 
( أي رب نطفة؟ أي رب علقة؟ أي رب مضغة؟ أي رب أذكر أم أنثى؟ أي رب أشقي أم سعيد؟ أي رب ما رزقه؟ أي رب ما أجله؟ )

وفى لفظ ( فيكتب الملك ويقضي ربك ما شاء )

فالرزق مكتوب مقدر....
 
والرزق يطلب صاحبه كالموت.........
 
ولن تموت نفس قبل ان تستوفى رزقها.



يروى أن إبراهيم بن أدهم -رحمه الله- جلس يوماً ليأكل بعض قطع اللحم المشوي، فجاءت قطة فخطفت قطعة وجرت فقام وراءها، ليتابع الموقف باهتمام فوجد أن القطة قد تركت قطعة اللحم في مكان مهجور في باطن الأرض وانصرفت، فظل جالساً يراقب الموقف ويتفكر ويتدبر، وفجاءة رأى ثعباناً فقأت عيناه لا يرى يخرج من هذا الجحر في باطن الأرض؛ ليجر قطعة اللحم إلى جحره فيرفع إبراهيم بن أدهم رأسه إلى السماء ويبكي ويقول:

"سبحانك يا من سخرت الأعداء يرزق بعضهم بعضا وَمَا مِنْ دَابَّةٍ فِي الْأَرْضِ إِلَّا عَلَى اللَّهِ رِزْقُهَا



كثير عارف النصوص دي لكن عند التطبيق في الحياة بتظهر المشكلة !

فنحاول دايما نربط النصوص بالتفكر في عظيم تدبير الله

كل واحد منا عنده بدل الدليل

عشرات الأدلة فى حياته الشخصية او فى حياة من حوله كلنا عندنا قصص ومواقف ربنا رزقك فيها من حيث لا تحتسب


فكر نفسك بيها عشان دايما قلبك يكون متعلق بالرزاق وحده

*ابسط حاجة مش أحيانا تكون ذاهب مكان وتركب مواصلة غلط او تنزل فى مكان مختلف وبعدين يحصل إنك تقابل حد فتساعده....

عمرك فكرت ان ربنا ساقك للمكان ده عشان تساعد الانسان ده تحديداً !

او لما روحت المكان ده اشتريت مناديل او أى حاجة من واحد غلبان

عمرك فكرت ان ربنا كتبله الفلوس دى رزق فانت جيت من اخر الدنيا عشان تديهاله...

والله لو نتفكر فى احداثنا اليوميه هنلاقى فى كل موقف اية من أيات الله.



ورغم كل ده كثير من تصرفاتنا ..للأسف

لا تدل على إننا عندنا يقين بإن الله هو الرزاق !

يقول الشيخ محمد حسان:

( والله لو فهمنا وتعبدنا لله باسم الرزاق على مراد الله وعلى مراد رسول ما قتل القاتل من قتل،
 
وما سفك الدماء من سفك،
 
وما كذب من كذب،
 
وما تملق من تملق،
 
لو علم أهل الأرض أن الرزق بيد الله،
 
 وأنه لا تستطيع قوة على وجه الأرض أن تحول بينك وبين زرق قسمه الله لك ما نافقت أحداً وما تملقت أحداً؛ لأن قلب من ترائي وتنافق بيد من عصيت .)





*أفعال تناقض ايماننا بأن الله الرازق وتشمل:
1
عدم الرضا وحسد الناس

اشكر الموجود ولا تحزن على المفقود
كن شاكر ,,

يعطينا ما يكفينا ونحن نطلب ما يطغينا !

هو مولانا الذي رزق وأكرم

ومتعنا بالسمع والبصر ورزقنا ماهو أعظم من هذا كله
" الاسلام "

طلب الرزق بمعصيته

قبل ما نذكر مواقف وصور لطلب الرزق بمعصية الله

* أن أرزاقنا مكتوبة قبل أن نولد

*مهما فعلنا لن نستطيع أن نأخذ أكثر من رزقنا ولو مثقال ذرة

صور من طلب الرزق بمعصية الله:


**المال:من يحصل على المال من حرام عن طريق :

الربا , السرقة ,النصب ,القمار,الغش, التجارة فى أشياء محرمة , فتح مشاريع محرمة ,الرشوة

و..... و..... و.....

**واحد بيشتغل فى بار بحجة مفيش شغل..
 
وأما الاقى حاجة هبقى أسيبه و أصل ...و أصل.....

ثوانى انت مؤمن ان الله الرازق؟
**واحدة مش لابسة حجاب عشان فى الشغل مشترطين عدم الحجاب
 
وأصل أنا عندى مسئوليات
 
 
 وأنا اللى بصرف على عيلتى ووالدتى مريضة
 
وأصل أنا محترمة ومحدش بيتجاوز حدوده معايا و..........و...................


انتى مؤمنة أن الله الرازق؟!!!!

يا ترى بتطلب رزق المال بالمعصية؟!

**السعادة: مش السعادة رزق


اللى شرب مخدرات كان عايز السعادة

واللى مقضى حياته أغانى وخروج وبنات كان بيدور على السعادة !

والى بتلبس لبس معين ومكياج وخروج كانت بتدور برضو على السعادة !

ولكن للأسف كلهم بيدورا في مكان غلط !

زى الى بيدور على عنوان في بلد تانية ! مستحيل يوصل !
شوفوا الموضوع هنا وحشة فى القلب !!

ياترى بتطلب رزق السعادة بالمعصية؟

**الزواج: مش الزواج برضه رزق

**تلاقى واحدة مش عايزه تلبس حجاب شرعى ليه؟

لما اتجوز هلبسه!

** واحده مصاحبة ليه؟!

محدش لاقى عرسان لازم أحجز واحد !!

ثوانى انتى مؤمنة ان الله الرازق؟





الخوف من الطاعة خشية حرمان الرزق


النوع الأول بيطلب الرزق عن طريق المعصية


النوع ده بيحب الطاعات ولكن الغريب أنه أحيانا بيخاف يعمل الطاعة عشان خايف على الرزق وده بيحصل من تأثره بالناس من حوله..

**واحد بيطلع زكاته بانتظام ولكن اتعرض عليه المشاركة فى مشروع خيرى (صدقة) فيبقى متردد أصل الفلوس هتقصر معايا و.....


**واحد عايز يحفظ قرآن بس ده هيتطلب تقليل ساعات عمله ساعه يوميا....متردد عشان المرتب آخر الشهر و.............


سؤال هل انتم مؤمنون بأن الله الرازق؟


والصور كثير جدا وياريت كل واحد يسأل نفسه

هل أفعالى مهما كانت صغيره تناقض ايمانى بان الله ارازق؟؟



*معنى لطيف حول صور طلب رزق الله بمعصيته..

**معنى لطيف التقوى أم الرزق أولا**

ركزوا في قول الله تعالى:

" وَمَن يَتَّقِ اللَّهَ يَجْعَل لَّهُ مَخْرَجًا  وَيَرْزُقْهُ مِنْ حَيْثُ لَا يَحْتَسِبُ .."
سبحان الله ترتيب الآيات بيعلمنا أدب معين:

لو عايز الرزق اتق الله الأول..
 
وهو سبحانه هيجعل لك مخرجا من الضيق اللي هتقابله في تحصيل الرزق الحلال وهيرزقك من حيث لا تحتسب

لكن

لسان حالنا يقول ارزقني يارب .. وبعدها اتقيك!

اديني يارب فلوس وأنا هنفق في سبيلك

ارزقني يارب زوج بس وأنا هظبط حجابي بعدها

وسبحان الله العليم الخبير..قال في سورة التوبة:

"وَمِنْهُم مَّنْ عَاهَدَ اللّهَ لَئِنْ آتَانَا مِن فَضْلِهِ لَنَصَّدَّقَنَّ وَلَنَكُونَنَّ مِنَ الصَّالِحِينَ 75 فَلَمَّا آتَاهُم مِّن فَضْلِهِ بَخِلُواْ بِهِ وَتَوَلَّواْ وَّهُم مُّعْرِضُونَ 76 فَأَعْقَبَهُمْ نِفَاقًا فِي قُلُوبِهِمْ إِلَى يَوْمِ يَلْقَوْنَهُ بِمَا أَخْلَفُواْ اللّهَ مَا وَعَدُوهُ وَبِمَا كَانُواْ يَكْذِبُونَ 77 أَلَمْ يَعْلَمُواْ أَنَّ اللّهَ يَعْلَمُ سِرَّهُمْ وَنَجْوَاهُمْ وَأَنَّ اللّهَ عَلاَّمُ الْغُيُوبِ 78"
فوارد جدا يرزقك بالى بتطلبه وبتحلم بيه ليل نهار

بس يكون الشىء ده مش دافع ليك إنك تقرب

بالعكس يكون فتنة وسبب بعدك وإنتكاسك !



فلا تعد الله بما لا تستطيع ولكن أسأله ما فيه الخير والإعانة على الشكر والطاعة ..

0 التعليقات:

إرسال تعليق